وجهت عبير أحمد مؤسس اتحاد أمهات مصر للنهوض بالتعليم، وائتلاف أولياء الأمور، حديثها إلي أولياء الأمور علي صفحة الاتحاد والائتلاف في الفيسبوك موجهة إليهم هذه الكلمات «رمضان كريم..أيه أفضل طريقة للمذاكرة في شهر رمضان؟ شاركونا بتجاربكم عشان نفيد بعض».

وقالت عبير أحمد مؤسس اتحاد أمهات مصر وائتلاف أولياء الأمور، إن تنظيم الوقت في شهر رمضان ما بين العبادة و مشاهدة المسلسلات والاستمتاع به وبين المذاكره، أمرا هاما، بالنسبة لطلاب جميع المراحل التعليمية، ولابد وأن يضع أولياء الأمور جدولا مناسب لأبنائهم، حتى لا يضيع الوقت.

أفضل عشر طرق للمذاكرة خلال شهر رمضان

وتفاعل العشرات من أولياء الأمور علي صفحة اتحاد أمهات مصر للنهوض بالتعليم، وائتلاف أولياء الأمور، في الفيسبوك، حيث قالت ولي أمر: “كل سنة وانتم طيبين ودايما يارب الفرحة والسلام لينا كلنا، رمضان كريم، المذاكرة طبعا بعد الفطار لأن النهار كله للمدرسة والدروس اللى طبعا كلها هتبقى قبل الفطار، هنلحق ساعتين تلاته قبل النوم نذاكر فيهم عشان كمان امتحانات الشهر”.

وأضافت ولي أمر أخري: “أعتقد أفضل وقت للمذاكرة قبل الفطار، الأولاد ينجزوا المهام المطلوبة منهم، لأن بعد المغرب التليفزيون بيسرق وقتهم”، وتقول أخرى: “أفضل وقت للمذاكرة قبل الفطار بساعتين يكونوا الولاد نامو شويه بعد رجوعهم من المدرسة”.

“مدرسة ابني ملتزمه جدا ولازم الأولاد تروح كل يوم والمديره بتعمل مسابقة لأفضل فصل فيه اقل نسبة غياب، وده بيحفز كل الطلاب بعدم الغياب، بنرجع من المدرسة بنيمه لحد آذان المغرب وبعد الفطار بنصف ساعة بنذاكر لحد عشره بالليل”، تضيف ولي أمر أخري: “رمضان صعب التنظيم فيه اوى، بس بحاول أعمل تارجت يخلص أسبوعيا بحيث إن آخر الأسبوع نشوف خلص ايه وناقص ايه واكيد بيقع حاجات بس بنحاول”.

واستكملت ولي أمر: “طبعا فى رمضان الوقت بيجرى بسرعة والمذاكرة هتكون صعبة واحنا صايمين، هنحاول نذاكر الصبح قبل الإفطار ونشاهد قنوات مدرستنا الاستفادة منها لأن وقت رمضان قصير جدا، ربنا معاكم ومعنا جميعا، وخصوصا الشهادات، لأن المنهج كبير ووقت رمضان قصير وبعد رمضان هندخل على الامتحانات، ربنا ييسر للجميع يارب”.

وذكرت ولي أمر أخري: “كل عام وأنتم بخير وسعاده، أعاده الله عليكم بالخير واليمن والبركات.. أعتقد أن أفضل طريقة للمذاكرة بعد صلاة التراويح الولاد تصلى وتبدأ تذاكر عن طريق تدوين المعلومات ومحاولة سماع الشرح وحل الأسئلة على كل درس أول بأول منعاً للتراكم ربنا معاهم ويوفقهم وكل عام وجميعنا بألف خير وسعاده”.