طالب الإعلامي تامر أمين بإجراء تغييرات جذرية على مناهج مرحلة الثانوية العامة، وخاصة مواد القسم الأدبي، قائلا: آن الأوان لتغيير المناهج، خاصة مناهج الأدبي فهي مشكلة المشاكل، وقولولى إيه فى المواد الأدبية بمرحلة الثانوية العامة مفيد هذه الأيام؟!، ايه الاستفادة إن طالب الثانوية العامة يدرس تاريخ، ومحدش يقولي يا نهار أسود أنت مش عايز تاريخ، بلاش الشعارات، خلونا في اللى بيأكل عيش ويجيب تقدم.
وقال تامر أمين خلال تقديمه برنامج “آخر النهار” عبر قناة النهار: “إحنا من الثمانينيات بنتكلم عن تطوير المناهج، وكل اللي حصل في 40 سنة إنك شيلت الحشو والزيادات، لكن المناهج هي هي بنسبة 90%، وآن الأوان نغيرها”.
تابع:المرحلة الثانوية أنت بتجهز الطالب لسوق العمل، فلا تدرس له تاريخ وجغرافيا، وعلم نفس وفلسفة ومنطق مش هيعمل بيهم حاجة، بالدليل إن 70 و80% من الطلاب بيهربوا من الأدبي للعلمي، وبدلا من فصول وأقسام الأدبي وتخرج الطلبة، مش متعلمين كويس ولا مستفيدين حاجة، نستبدل المواد دي في المرحلة الثانوية بمواد يستفيدوا بيها.
وأضاف: القسم الأدبي مشكلة المشاكل، إيه في المواد الأدبية اللي بيدرسها طلبة الثانوية العامة مفيد هذه الأيام؟ وإيه استفادة طالب الثانوية العامة في دراسة تاريخ وجغرافيا لمدة 3 سنوات؟ ويدرس فلسفة ومنطق ليه؟ هيستفيد منهم في إيه عند الدخول إلى الكلية أو سوق العمل؟.
وتابع تامر أمين: الطالب ممكن يدخل آداب قسم فلسفة، على عيني وراسي لكن يتخرج إيه؟ هل عندنا وظيفة اسمها فيلسوف؟ آخره يحاول يدور على شغلانة مدرس فلسفة، وكذلك أقسام التاريخ.
وطالب تامر أمين بأن يقتصر تدريس المواد الأدبية على المراحل المبكرة من التعليم، قائلا: المواد دي درسوها في ابتدائي وإعدادي وكفاية، وفي المرحلة الثانوية جهز الطالب لسوق العمل.
