لطلاب الثانوية الأزهرية: إزاي تتصرف لو نسيت رقم الجلوس أو اتأخرت عن اللجنة؟

مع اقتراب انطلاق امتحانات الثانوية الأزهرية 2025 ، والضغط النفسي الكبير اللي بيعيشه الطلاب، ممكن يحصل مواقف طارئة زي نسيان رقم الجلوس أو التأخر عن دخول اللجنة. وعلشان ما تضيعش عليك الفرصة، موقع “في الجامعة” بتقدملك الدليل العملي للتصرف الصح في الوقت المناسب.

نسيت رقم الجلوس؟ اتصرف بسرعة كده:

اتوجه فورًا للكنترول أو إدارة المعهد اللي انت تابع ليه، واطلب منهم رقم جلوسك. لازم يكون معاك إثبات شخصية (بطاقتك أو كارنيه المعهد).

لو الوقت ضيق قبل الامتحان مباشرة، روح على طول للجنة الامتحان، وهما هيتعاملوا معاك ويدوروا على اسمك في الكشوف الاحتياطية، أو يتواصلوا مع الكنترول.

خلي صورة من رقم الجلوس دايمًا على موبايلك أو مطبوعة احتياطي في شنطتك، علشان تتفادى الموقف ده تمامًا.

تأخرت عن اللجنة؟ اعرف اللي ليك واللي عليك:

لو التأخير بسيط (من 5 لـ15 دقيقة) ولسه باب اللجنة مفتوح، غالبًا هيسمحوا لك بالدخول، لكن الوقت الضايع مش بيتعوض.

لو التأخير أكتر من كده، اللجنة من حقها ترفض دخولك، وبيتحرر لك محضر غياب عن المادة دي، إلا لو معاك عذر قوي ومثبت (زي تقرير طبي أو ظرف طارئ واضح).

في حالة وجود ظرف طارئ حقيقي زي حادث أو تعب مفاجئ، لازم تقدم طلب لإدارة الامتحانات بقطاع المعاهد الأزهرية، ومعاه المستندات الداعمة، وده ممكن يخليك تعيد المادة في الدور التاني بدون رسوب.

نصائح لطلاب الثانوية الأزهرية 2025

حضّر شنطتك ومستلزماتك من الليلة اللي قبل الامتحان، ومعاها بطاقة رقم الجلوس وأي أوراق ضرورية.

سيّب وقت كفاية قبل الامتحان علشان توصل بدري وتتجنب الزحمة أو أي ظروف خارجة.

حافظ على هدوءك، وتذكّر إن التصرف بهدوء في المواقف الطارئة هو اللي بيخلّيك تتخطّاها بنجاح.