ندا الأولى على الدبلومات: “نظّمت وقتي صح.. وهدفي السياحة والفنادق ومنحة خارجية”

كتبت/ مي علوش

قالت ندا صابر فؤاد، الأولى على الدبلومات الفنية الزراعية بنسبة 96.98%، إنها اعتمدت على تنظيم وقتها وتحديد أولوياتها بدقة، بدلًا من التركيز على عدد ساعات المذاكرة.

وأضافت في تصريحات خاصة لـ “في جامعة”: “مكنتش بظل بالساعات، لكن كنت بقسم وقتي كويس، كنت بذاكر من 11 صباحًا لحد 3، وبكمل بالليل، والنتيجة الحمد لله كانت تستاهل التعب”.

وأردفت: “كنت متوقعة أطلع من الأوائل، بس مش الأولى.. وفرحتي النهاردة أكبر من أي توقع”.

وأضافت ندا، أن حلمها هو الالتحاق بكلية السياحة والفنادق، مؤكدة: “ده هدفي، وبعدها نفسي أقدم على منحة خارجية لما أتعلم لغة كويس”.

وأشارت إلى أن مشوارها لم يكن خاليًا من التحديات، قائلة: “كلنا طبعًا بنواجه صعوبات، أوقات بنفقد الشغف وبنعدي بظروف ومشاكل”.

أكدت: “الحمد لله، كنت دايمًا بتشجيع من أهلي، وكانوا دعم كبير ليا، وكنت بحاول أتجنب الضغوط وأفضل فخورة بنفسي، وبحفز نفسي دايمًا عشان أكون حاجة كويسة في المستقبل”.

واختتمت حديثها برسالة قوية لزملائها، قائلة:”أنصح كل الشباب مييأسوش، لسه قدامهم اختيارات كتير، ومحدش يفقد الشغف، حتى لو النهاردة ظروفنا مش مثالية، بكرة أكيد هيكون أفضل”.