نيرمين أسامة تكتب: أنا عايز أكون فين بعد 5 سنين؟

أنا عايز أكون فين بعد 5 سنين؟ سؤال بسيط في كلماته.. بس عايز رحلة داخل العقل والقلب والمعتقدات.. النفسية جانب مهم جدا.

اسال السؤال نفسيتك معتدلة أو جيدة.. الإجابة هتختلف صدقني.

“أنا عايز أكون فين بعد 5 سنين؟”.. ليه أسأله لنفسي؟.. السؤال ده مش مجرد دردشة.. السؤال ده بداية رسم طريق رحلتنا في الحياة.

نفكر ثواني القطار والطائرة بيحددوا اتجاه السير ليه؟ لمعرفة الوقود والوقت والاستعداد لمواجهة الطريق بتحدياته، والحياة محتاجة تحديد رؤية وهدف لمعرفة اي طريق أمشي فيه وأعرف أوصل لفين وامتى واستعد للتعامل مع تحديات هذا الطريق ويكون عندي أكثر من خطة في الطريق المهم أجرب وأوصل.

والسؤال “أنا عايز أكون فين بعد 5 سنين؟” مهم جدا بيعيد تركيزك على المستقبل وتنفيذ أحلامك في الواقع وبيبعدك عن التشتييت وأي مظاهر تشغلك، بيوضح لك الطريق للجوانب الشخصية والتعليمية والعملية والعائلية والاجتماعية والمادية.

وإعادة تركيز طاقتك في الاتجاه الصح وتحافظ على وقتك.. وبعد التنفيذ بخطوات هتشعر إن كل لحظات حياتك لها معنى وهدف وتجديد ونجاح.. عارفه هتقولوا إيه في ناس عايشة من غيرماتسال نفسها هذا السؤال وعايشة عادي.. إنت قولتها عايشة عادي مفيش تجديد مفتقد للمعنى والثقة في النفس والنجاح.

والأهم إنه مفتقد يعيش الحياة.. اسمع مني وجرب “ملحوظة” للبنات استمتعوا بالخطوات و”ملحوظة ” للذكور عيش الانجاز سر من الأسرار.

تعالوا نجرب سوا في خطوات بسيطة وكل ما الخطوة كانت أصغر كل ما النجاح والنتيجة كانت أفضل يالا بينا إلى رحلة متجددة أول خطوة

1. نحدد الهدف نكتبه بوضوح مثلاً: اكتب من أول الفكرة ما اتولدت في عقلك كانها فيلم بالألوان، شفتوا أفلام قبل كده صح تخيل فيلم بالتفاصيل والألوان والمشاعر والناس اللي هتتعامل معاهم حتى إذا مكنتش عارفهم وأكيد انت مش عارفهم وشوف نفسك بالملابس والألوان اللي إنت بتحبها وكل خطوة مدتها واتجاهها والمعلومات اللي محتاجها في الخطوة دي والإمكانيات اللي هتستعملها ما معنى الإمكانيات سمعاك.. إمكانياتك المادية تحديدها بالمعقول والواقع ومصادر توفيرها – عندك إمكانيات اجتماعية هتستخدمها.. وكمان اسأل اهل الخبرة.. بس لا تسأله عن أرباحة المادية.. إساله في الخطوات وتنفيذها خبرته هتوفرلك وقت وفلوس وجهد.. بمعنى ابدء من حيث وصل الآخرون واستفيد من خبراتهم وتخيل نفسك وانت بتتعامل مع مواقف الاخرين بطرق جديدة وافضل مناسبة لك.

والخطوة التالية حدد عايز تقرأ وتجمع معلومات عن هدفك ورؤيتك. ماهي مصادر هتستخدمها في القراءة وتجميع المعلومات “القراءة، الكورسات، التجارب العملية”.

ملحوظة: مش كل المعلومات مناسبة لك استخدم مايناسبك ومتقولش مش مناسب ليا اختار المناسب ليك وفصله على إمكانياتك وأنت في الرحلة حدد كل شهر أسأل نفسك أنا وصلت لفين وعدل خطتك.

سر من أسرار النجاح بلاش تاخد المواقف على إنها صدمات غير المعتقد اللي عشنا به سنين وسجنا داخليا.. اتعلم من كل المواقف بسلوك إيجابي “سلوك ينفعك” في الحاضر والمستقبل.

وسر أخر هو المرونة عارف النمل اتفرج عليه وهو ماشي محدد هدفه وطريقه جرب ضع أمام طريق النمل أي شئ كسد أمامه هيغير طريقه بعد لحظة من إدراكه أن في تحدي وهيوصل لهدفه هيوصل الكون ليس ثابت كل لحظة متغيرة ولم ندرب على إدراك التغير اللحظي.

تخيل إنك حققت هدفك حدد الهدف التالي والتالي عيش رحلة ممتعة سؤال مهم أحافظ على هدفي وخطواتي ورحلة حياتي؟

تذكر دائما أنك قدوة لك أولا وقدوة للآخرين نتكلم بصراحة هتقابل ناس يتكلموا عنك ويشجعوك ويعملوا زيك وفي آخرين هيمثلوا أنهم مش شايفينك بس برضه هيعملوا زيك في كل الحالات.

تذكر إنك قدوة ولك بصمة وأثر طيب لا تنتظر تشجيع من الآخرين شجع نفسك بنفسك.

انشر قصتك والاستفادة منها وشارك خبراتك والتجارب والاستفادة مع الاصدقاء والاصحاب وفي بوستات علي كافة منصات التواصل الاجتماعي.

ابدأ من اللحظة التالية، وخلي خطواتك الصغيرة تكتب قصتك الكبيرة.

عارف إنك بدأت طريقك مع ولادة رؤيتك وهدفك وبداية تفكيرك.

بقلم نيرمين أسامة

لايف كوتش