من عيون الفجر بتبدأ الحكاية، مش مجرد صلاة بنأديها وننام بعدها، لكنها “ساعة الصفر” لكل إنجاز بنشوفه على أرض مصر.
لما تلاقي القائد صاحي من الفجر، مرة وسط طلاب الأكاديمية العسكرية بيغرس فيهم الانضباط، ومرة بيفتتح مشروع صناعي أو زراعي بيأمن قوت المصريين، ومرة تانية بيسافر من بلد لبلد في جولات مكوكية عشان يحمي أمننا القومي ويجيب صفقات وسلاح يحمي الأرض.. هنا بنفهم المعنى الحقيقي للإيمان.
الإيمان مش شعارات ولا صور بنتاجر بيها عشان نكسب تعاطف الناس، الإيمان الحقيقي هو “عمل وسعي وإصلاح”. الفرق كبير جداً بين اللي بيستخدم الدين كواجهة وهو مبيعملش حاجة تخدم البشر، وبين اللي بيقوم من الفجر يتوكل على الله ويبدأ يومه بشغل وتعب وشقى عشان يشيل أمانة 100 مليون نفر متعلقين في رقبته.
النهاردة، وصلاة الفجر في مسجد “العزيز الحكيم” بالمقطم، كانت رسالة واضحة إن بناء المساجد في مصر مابقاش مجرد حيطان ومآذن، دي بقت مراكز خدمة فيها حضانة ومستوصف طبي وقاعات علم، يعني عمارة للأرض والروح مع بعض. ولما نعرف إن في عهد الرئيس السيسي وصل عدد المساجد اللي اتبنت واتجددت لحوالي 14 ألف مسجد، هنعرف إن اللي بيعمر بيوت الله بجد هو اللي بيعمر حياة الناس وبيوفر لهم الأمان والخدمات.
صلاة الفجر هي الوقود اللي بيدي العزيمة عشان السعي يكمل، والتوكل على الله هو اللي بيخلي الشغل يطرح خير وبركة. مصر النهاردة بتتحرك بمنهج “صلاة وعمل”، بتبدأ يومها بركعتين لله وتكمل يومها بعرق في كل شبر في أرضها، وده هو جوهر الدين الحقيقي اللي بيعمر مش بيهدم، وبيجمع مش بيفرق.
الدكتور محمود خليل
الأستاذ بكلية الآداب جامعة سوهاج
مستشارا للإعلام والاتصال السياسي بجامعة سوهاج
