أكد الكاتب الصحفي أحمد الديب، رئيس تحرير موقع «في الجامعة»، أن ذكرى انتصارات أكتوبر ستظل حاضرة في وجدان المصريين، قائلًا: «٥٣ سنة والعبور لسه مكمل».
وقال الديب: «النهارده ٦ أكتوبر وبنحتفل بمرور ٥٣ سنة على أعظم نصر في تاريخنا الحديث، يوم ما الجندي المصري عدى القناة وحطم خط بارليف اللي قالوا عليه مستحيل يتعدي، يوم ما العلم المصري رفرف على أرض سينا بدم ولادنا وعرقهم وإيمانهم بربنا وبالبلد دي».
الكاتب الصحفي أحمد الديب في ذكرى نصر أكتوبر: 53 سنة والعبور لسه مكمل
وأشار إلى أن «أكتوبر مكانش مجرد حرب انتصرناها، أكتوبر كان درس للدنيا كلها إن المصري لما بيحط حاجة في دماغه مفيش قوة تقدر توقفه، كان تخطيط وصبر وسياسة وعقل قبل ما يكون سلاح ورجالة».
وأضاف: «والنهارده بعد ٥٣ سنة مصر مش بس فاكرة النصر ده، مصر جاهزة تكرره في أي وقت وتحت أي سما».
وتابع: «جيش قوي ومتطور في البر والبحر والجو، وقيادة سياسية واعية عارفة إمتى تتكلم وإمتى تتحرك، وشعب واقف ورا جيشه زي ما وقف ورا ولاده في ٧٣».
وشدد الديب على أن «إحنا مش بنعتدي على حد ولا بندور على حرب، بس اللي يفكر يقرب من أرضنا أو شعبنا أو مقدراتنا يبقى ميعرفش مصر كويس».
واختتم حديثه قائلًا: «خير أجناد الأرض لسه موجودين وهيفضلوا موجودين لحد يوم الدين. تحية لكل شهيد روى الأرض دي بدمه، وتحية لكل بطل لسه عايش وشاهد على المجد ده، وتحية لكل جندي واقف على الحدود دلوقتي عشان إحنا ننام مطمنين.
