كتبت – سوزان الجمال
عبّر الطالب محمد نجيب من جامعة المنيا ممثل مصر في منتدى شباب اليونسكو، في تصريحات صحفية خاصة لموقع “في الجامعة“، عن فخره الكبير بتمثيل مصر في المنتدى الرابع عشر لشباب اليونسكو، الذي عُقد بمدينة سمرقند بأوزبكستان، مؤكدًا أن المشاركة كانت خطوة مهمة في حياته وتحمل مسؤولية كبيرة تجاه شباب مصر.
وقال نجيب: “طبعاً كنت فخور جدًا بالخطوة دي في حياتي، علشان أنا شايف إن المشكلة دي مش بيئية بس، دي ليها توابع اجتماعية واقتصادية وكمان سياسية، وده أكتر حاجة لينا إحنا في مصر مثلاً، إحنا داخلين مع مشاكل كبيرة مع دول زي إثيوبيا بسبب تغير المناخ، وفي نفس الوقت فخري بالمشاركة مش مانعني إني شايف إنها مسؤولية كبيرة عليا إني أتكلم بلسان كل الشباب المصريين، لازم أكون دلوقتي حذر من كل كلمة بقولها علشان أنا بمثل شباب مصر كله.”
وأضاف: ” انا اتكلمت شباب من جامعات مختلفة، من ثقافات مختلفة، جامعات زي جامعة القاهرة، عين شمس، الجامعة الأمريكية، وجامعة المنيا، فكنت حريص جدًا إن يبقى فيه شمولية في الموضوع، لأن مصر كبيرة جدًا وفيها ثقافات كتير، فكنت حريص جدًا إن الصورة اللي أقدمها تبقى كاملة وآراء الشباب المصريين من كل الخلفيات تبقى موجودة، فكان شعوري فخر ومسؤولية في نفس الوقت.”
محمد نجيب يحكي قصة تمثيل مصر في منتدى شباب اليونسكو
وتحدث محمد نجيب عن طريقة اختياره لتمثيل مصر، موضحًا: “المشاركة كانت الأول عن طريق أكاديمية البحث العلمي والتكنولوجيا رشحتني للجنة الوطنية لليونسكو، الأكاديمية طلبت مني أكتب ثلاث مقالات عني وعن نشاطاتي وإزاي أنا شايف إن أنا شخص مناسب للفرصة دي، وبالفعل رشحوني، ورشحوا طلاب كتير معايا، بعد كده اللجنة الوطنية عملت معايا انترفيو عن طريق الموبايل”.
وأضاف: “وطلبوا مني كمان مقالات تانية، وفي الآخر رشحوني رسميًّا لليونسكو، منظمة اليونسكو في باريس هي اللي اختارتني في النهاية، العملية كلها كانت صعبة جدًا وتنافسية جدًا، وكان فيه احتمال كبير إني ما أتقبلش، بس بالشغل اللي عملته، وتوفيق ربنا، الأمور مشت الحمد لله.”
وعن فكرة مشاركته في المنتدى، قال: “المنتدى كان بيتكلم عن العمل المناخي وتأثيره على الحياة الاجتماعية أو الـ social life، أنا كنت مركز أكتر على إنّي أظهر المشاكل أو العقبات اللي بتواجهنا إحنا كشباب لما نحاول نشارك في الحركة المناخية، ودي مشاكل واجهتني أنا شخصيًا، فكنت بركز على إننا محتاجين الحكومات والمنظمات الكبيرة زي اليونسكو والأمم المتحدة إنهم يمكنونا أكتر ويخلوا صوتنا مسموع في المؤتمرات، سواء العالمية أو المحلية، ولازم يبقى فيه شباب موجودين على ترابيزة اتخاذ القرار.”
ابن جامعة المنيا يرفع اسم مصر في منتدى شباب اليونسكو
وتابع: “بعد ما تم اختياري لليونسكو، قدمت كمان على دور عضو في اللجنة التوجيهية، وده كان أصعب بكتير لأن المنافسة كانت عالمية قدمت، والحمد لله اتقبلت، وده مش فخر ليا أنا بس، لأ ده فخر لينا كمصريين إن مصر تبقى ممثلة في اللجنة التوجيهية، كنا دايمًا على تواصل مع أمناء اليونسكو علشان نحضّر المؤتمر، عملنا الأجندة كلها من الألف للياء، وتواصلنا مع المندوبين من كل أنحاء العالم علشان نضمن إن أفكارهم وهمومهم تكون مسموعة في المنتدى.”
وأضاف بفخر واضح: “اليونسكو كمان اختارتني إنّي ألقي الكلمة الختامية للمنتدى على لسان كل المندوبين وأمناء اليونسكو، كنت قاعد على الستيدج جنب رئيسة المؤتمر العام لليونسكو والمدير العام المساعد ووزير من أوزبكستان، وده طبعًا مش فخر ليا أنا بس، ده فخر لمصر كلها، لأن مصر هي اللي ألقت الكلمة الأخيرة، وبدأت كلامي بعبارة (أنا من مصر) رغم إن ده ما كانش مطلوب مني، بس قلتها علشان أتأكد إن الكل يعرف إن المتحدث مصري، خصوصًا مع التزامن مع اختيار دكتور خالد العناني لمنصب في اليونسكو، فكان تمثيل مصر في المنتدى حاجة عظيمة جدًا.”
واختتم نجيب تصريحاته قائلًا: “التجربة علمتني حاجات كتير جدًا، أهمها إن اختلاف خلفياتنا أو بلادنا مش بيفرقنا، بالعكس ده بيقوي الحوار بيننا مثلًا، كنت شايف مشكلة معينة بتواجهنا في مصر، لكن زمايلي من أوروبا شايفين مشاكل مختلفة، وده خلانا نكمّل بعض، اتعلمت إن التنوع مش ضعف، بالعكس هو قوة، ولو استخدمناه صح نقدر نقوّي الحركة المناخية ونخلق تأثير حقيقي.”
